CCCLXXII.

1490, Januar 2. Schloss Glatz.

Herzog Heinrich d. A. von Münsterberg und Graf zu Glatz transsumiert ein Brauprivileg des Königs Mathias von Ungarn und Böhmen, d. d. Wien 1489, März 5, für das Kloster.

Henricus senior dei gracia dux Monsterbergensis comes Glatcensis etc. Ad universorum noticiam volumus pervenire, nos quandam litteram serenissimi et invictissimi principis et domini, domini Mathie Ungarie, Bohemie etc. regis, ducis Austrie etc. cum suprascriptione commissionis et sigillo applicato sigillatam eiusdem domini regis in papiro latine scriptam, sanam et integram, non abrasam, non cancellatam nec in aliqua parte suspectam in manibus habuisse, legisse et diligenter conspexisse. Cuius tenor sequitur de verbo ad verbum: Mathias dei gracia Ungarie Bohemieque rex, necnon Austrie dux etc., fidelibus nostris egregiis capitaneis, item circumspectis magistro civium ac iudici et iuratis, necnon consulatui ceterisque civibus et toti communitati civitatis nostre Swydnycensis salutem et graciam. Expositum extitit maiestati nostre pro parte et in persona fidelis nostri, venerabilis et religiosi fratris Jacobi abbatis et conventus de Camencz cum querela, quod licet ipse abbas conventusque ipsius antiqua consuetudine ipsorum requirente in thaberna ipsorum, que Wirben vulgariter nuncupatur, pro sustentacione fratrum et reformacione claustri prefati sine aliquali contradictione cerevisiam braxandi liberam habuerint potestatem huiusmodi, qua libertate ab antiquo abbates et conventus prescripti usi fuerint et gavisi. Vos tamen nescitur quibus etc. respectibus contra consuetudinem antiquam ac libertates prescripti conventus ipsum abbatem hiis temporibus preteritis inhibuissetis, ne cervisiam huiusmodi in thaberna sua braxare deberet in eiusdem abbatis preiudicium dampnumque conventus eiusdem non modicum. Cum autem nos conventum prefatum abbatemque eiusdem in nostram regiam receperimus protectionem et tutelam specialem velimusque eundem in omnibus libertatibus et consuetudinibus, quibus antiquitus usi sunt, deinceps quoque pacifice conservari. Ideo volumus et fidelitati universitatis vestre harum serie districte precipientes mandamus, ut acceptis presentibus rebus premisso modo se habentibus, amodo prefatis abbati et conventui de Camencz in thaberna ipsorum pro sustentacione fratrum et reparacione claustri prescripti cervisiam braxare eamque iuxta veterem et antiquam eiusdem claustri consuetudinem abbati ipsi vendicionem exponere permittere debeatis, aliasque ipsum abbatem et conventum in iuribus et antiquis libertatibus ipsorum impedire, turbare seu quovismodo dampnificare non presumatis neque sitis ausi modo aliquali gracie nostre sub obtentu presentibus perlectis exhibenti restitutis. Datum Wienne civitate nostra Australi feria quinta proxima ante dominicam Invocavit anno domini millesimo quadringentesimo octoagesimo nono, regnorum nostrorum Hungarie etc. anno tricesimo primo, Bohemie vero vigesimo. In quorum omnium et singulorum premissorum evidens testimonium presentes litteras nostro maiori sigillo subappenso fecimus communiri, ex castro comitatus nostri Glatczensis, sabbato post Circumcisionem domini annorum salutis millesimo quadringentesimo nonagesimo.

Or. Perg. An Pergamentstreifen das wohlerhaltene S. des Herzogs.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.